Qysh me i shmangë incidentet gjatë udhëtimit?

nga Argjenda Selmani

​Gjatë udhëtimeve mund të përballeni me sfida të ndryshme. Incidentet ndodhin. Ndonjëherë gjërat e tilla na gjejnë pa përgatitur. Megjithatë ka shumë rëndësi që të përgatitemi paraprakisht për disa gjëra që e dimë se mund të na ndodhin.

Kujdes nga insektet dhe kafshët

Disa nga incidentet më të shpeshta ndodhin me kafshv apo insekte. Prandaj tregohuni të kujdesshëm për të parandaluar, mbi të gjitha, pickimet e bezdisshme të insekteve. Nëse insekti ju ka pickuar dhe dëshironi të kuroni vendin e pickimit me diçka natyrale, mund të fërkoni vendin e pickuar me diçka të thartë (si p.sh limoni) ose ta fërkoni me borzilok. Në rastin e një takimi të padëshiruar me një iriq deti, duhet të nxirrni gjembat me një piskatore, ose me një age të sterilizuar, pra veglat që do përdoren duhet të lahen dhe të dezinfektohen.

Mbrohuni nga dielli

Një problem tipik është “goditja nga dielli”, një shqetësim i shkaktuar nga temperaturat e larta. Shfaqet me dhimbje koke, kruajtje tek veshët, rritje të temperaturës së trupit, mungesë djersitjeje dhe ulje e tensionit. Gjëja më e menjëhershme që duhet të bëhet është të çoni njeriun e dëmtuar në hije, ta shtrini me këmbët të ngritura më lart se niveli i kokës. Më pas vazhdoni ta lagni me ujë të ftohtë në fytyrë dhe në sqetulla.

Sigurohuni që temperatura e trupit të zbresë nën 38 gradë, nëse jo, duhet ta dërgoni në urgjencë. Djegia nga dielli, shkaktohet nga ekspozimi për një kohë të gjatë në diell. Nëse jeni djegur dhe nuk keni përdorur krem me filtër mbrojtës, duhet të vendosni mbi lëkurë krem hidratant, ose një krem me përmbajtje kortizoni, nëse djegiet janë shumë të dukshme.Nëse dhimbja është shumë e madhe, mund të përdoren qetësues të zakonshëm, siç janë paracetamoli, ose ibuprofeni.

Verës kujdes të shtuar nga gjarpëri

Pickimi i gjarprit është një tjetër rrezik që mund të na shkaktohet në verë. Ky mund të jetë një nga incidentet më të pakëndshme. Mos fusni kurrë duart nëpër gurë (sidomos nëse gurët janë të ekspozuar në diell). Shikoni më parë vendin ku do të uleni dhe të vishni këpucë të mbyllura. Në rast pickimi duhet të çani vendin e pickuar, për të dalë gjaku me përmbajtje helmi dhe të vraponi për në ndihmën e shpejtë.