TV Klan Live

Lajme Arkiva 2006

Vlora është bërë për herë të parë mikpritëse e Festivalit Folklorik Mesdhetar.

Në katër netët e këtij evenimenti të financuar dhe ideuar nga Bashkia e Vlorës në skenat e improvizuara do të ngjiten 380 artistë që përfaqësojnë ansamble folklorike nga Spanja, Italia, Greqia dhe Izraeli, si dhe ansambli i këngës dhe valleve i vendit tonë.

Kostume kombëtare dhe gjuhë e kultura të ndryshme do të bashkohen në një të vetme duke i dhënë formë të parit edicion mesdhetar të këtij lloji.

Koordinatorët e festivalit synojnë që ky eveniment të kthehet në një traditë që do të ndikonte edhe në zhvillimin e turizmit të zonës.

“Për nga ideja, qëllimi, organizimi dhe pjesëmarrja ky festival shënon një kulm të aktiviteteve kulturore në Vlorë, sa më tepër kur ky është instaluar në kulmin e sezonit turistik. Festivali Folklorik Mesdhetar Vlora 2006, i cili startoi këtë vit përfundimisht e fut Vlorën me shumë dinjitet në agjendën e qyteteve të shumtë në Evropë edhe në botë që realizojnë festivale folklorike.”

Nata e parë u hap me shfaqjen e ansamblit, Labëria, të qytetit mikpritës të festivalit dhe u ndoq me interes nga publiku vendas dhe turistët e shumtë të qytetit bregdetar./tvklan.al

Gazetare: Fjodora Fjora

SUBSCRIBE to “RTV KLAN” on YouTube for more videos!

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook: https://www.facebook.com/tvklan/
Follow rtvklan on Instagram: https://www.instagram.com/rtvklan/
Programet e Tv Klan mund t’i ndiqni edhe në faqen https://tvklan.al/programe/

Lajme arkiva 2006

3 anëtarët e rinj të KQZ, Flamur Çato i përzgjedhur nga KLD, Arben Ristani nga Kuvendi e Fatmir Kumbaro nga Presidenti i Republikës, kanë bërë betimin përpara kreut të shtetit duke i plotësuar kështu zyrtarisht konfirmimin e organit që mbikëqyr ecurinë e zgjedhjeve në Shqipëri. Presidenti Moisiu u ka kërkuar anëtarëve të rinj, të respektojnë kushtetutën e ligjet e shtetit.

Afred Moisiu: “Pavarësisht si zgjidheni, detyra juaj është të respektoni Kushtetutën dhe ligjin. Është në ndërgjegjen tuaj morale, kushtetuese dhe ligjore, që gjithmonë të keni parasysh, kërkesat për të cilat fola më lart. Duke i qëndruar luajal në detyrën tuaj, është shumë e rëndësishme, që ju me qëndrimin punën dhe bashkëpunimin tuaj, të përçoni një frymë të tillë, që të sjellë bashkëpunim dhe jo çoroditje në forca të ndryshme politike”.

Më pas anëtarët e rinj kanë marrë zyrtarisht në një ceremoni të veçantë postet e tyre në KQZ. Kryetari i komanduar Klement Zguri është angazhuar në emër për të të gjithë anëtarëve për organizimin e zgjedhjeve vendore, sipas parametrave të kërkuara nga ndërkombëtarët në mënyrë që ato të mos vlerësohen më me fjalinë klishe, si “më të mira se zgjedhjet e kaluara”.

Klement Zguri: “Situatat politike në momente të veçanta apo dhe fakti që në këtë detyrë jemi të propozuar nga forca të ndryshme politike, nuk duhet në asnjë mënyrë të ndikojë në veprimtarinë, gjykimin dhe vendimmarrjen tonë. Angazhime që duhet të jenë vetëm në përputhje të plotë me kushtetutën dhe kodin zgjedhorë, duke përmbushur kështu dhe betimin e bërë, kur kemi pranuar funksionin e anëtarit të KQZ”.

Arben Ristani: “Dua të garantojë kolegët po dhe gjithë zgjedhësit shqiptarë që puna ime në këtë komision do të jetë e bazuar në ligj, në moral dhe në përgjegjshmërinë në kryerjen e detyrës”.

Pas 3 muajsh vonesë KQZ, i cili ka 4 anëtarë nga mazhoranca e 3 nga opozita, pritet të zgjedhë kryetarin e ri dhe më pas mund të nisë punën për organizimin e zgjedhjeve vendore, me një ogur rastësorë të mirë, në mungesë të një kodi të ri zgjedhorë, i cili ka mbetur peng i komisionit parlamentarë të bllokuar për reformën zgjedhore./tvklan.al

Gazetare: Mimoza Koçiu


SUBSCRIBE to “RTV KLAN” on YouTube for more videos!

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook: https://www.facebook.com/tvklan/
Follow rtvklan on Instagram: https://www.instagram.com/rtvklan/
Programet e Tv Klan mund t’i ndiqni edhe në faqen https://tvklan.al/programe/

Lajme arkiva 2006

Të gjitha bashkitë në vend do detyrohen me ligj që të përgatisin brenda një afati të caktuar kohor planet e përgjithshme rregulluese urbanistike. Në mbledhjen e radhës së Këshillit të Rregullimit të Territorit të Republikës (KRRTRSH), kryeministri Berisha ka ngarkuar me detyrën e përgatitjes së kuadrit ligjorë Ministrin e Punëve Publike dhe atë të Brendshme për t’i dhënë fund kështu studimeve pjesore, të cilat sipas kryeministrit kanë gjeneruar ryshfete, duke filluar nga Bashkia e Tiranës.

Sali Berisha: “E gjitha kjo është shtyrë vetëm për motive korruptive dhe babëzisë, dhe ndodh kjo që ndodh në Tiranë, apo që ndodh dhe në qytete të tjera. Është jashtëzakonisht e rëndësishme se tani jemi dhe duke hartuar buxhetin dhe ne të parashikojmë në buxhet, të gjithë fondet e nevojshme për këto plane”.

Akuzat ndaj Ramës kanë vijuar dhe më tej, pasi në detyrën e kryetarit të KRT së Tiranës, Rama ka bllokuar dhe detyrën e projektimit të kompleksit të ri parlamentarë që pritet të ngrihet në lulishten e kryesisë së kuvendit, sipas një vendimi të qeverisë së mëparshme. Por edhe bllokimin në një leje ndërtimi për Ambasadën Zvicerane. Për të zhbllokuar këtë situatë KRRTRSH miratoj ndryshimet në rregulloren e urbanistikës për qytetin e Tiranës.

Sali Berisha: “Ai që kur ka lënë bashkinë, i ka blloku projektin dhe nuk sjell projektin, mirëpo buxheti është.. digjet. Janë caktuar nuk mbaj mend, 2 apo 3 milion dollarë vetëm për tenderin e projektit të seancë parlamentit e të kompleksit. U detyruam atëherë të veprojmë në këtë mënyrë. Po kështu se as la pa sens ... nuk lejon këtë ambasadë, nuk jep lejon të ndërtojë një facilitet 2 katesh, në oborrin që ka të vetin për të zgjeruar godinën për viza, se çfarë inatesh ka, i kanë heq ndonjëherë ndonjë vizë apo ndonjë gjë tjetër, atë e din vetë ai, por këtë veprim s’mund ta bëj”.

Mes shumë vendimesh të marra KRRTRSH ka rrëzuar lejen e KRT së Bashkisë së Vlorës për një objekt 12 katesh pranë kalasë së skelës, me argumentin se zona është shpallur monument kulture, ndërsa ka miratuar ngritjen e një parku të gjelbër prej 5.5 hektarësh pranë pistës së ish-aeroportit të vjetër në kryeqytet./tvklan.al

Gazetare: Mimoza Koçiu


SUBSCRIBE to “RTV KLAN” on YouTube for more videos!

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook: https://www.facebook.com/tvklan/
Follow rtvklan on Instagram: https://www.instagram.com/rtvklan/
Programet e Tv Klan mund t’i ndiqni edhe në faqen https://tvklan.al/programe/

Lajme arkiva 2006

Sipas Partisë Socialiste, mazhoranca po ushtron presion ndaj presidentit Moisiu, për të ndikuar në vendimmarrjen e tij lidhur me shkarkimin ose jo të kryeprokurorit Theodhori Sollaku.

Fatmir Xhafaj: “Deklaratat e kryetarit të komisionit të këtij komisioni hetimor parlamentar dhe zëdhënësve politik të mazhorancës, janë tërësisht në kundërshtim me Kushtetutën dhe bëhen vetëm për të shantazhuar, vendimmarrjen e presidentit të republikës”.

Edhe pse Kuvendi tashmë ka vendosur t’i ofrojë kreut të shtetit gjithë dokumentacionin e kërkuar, opozita ka përgatitur një dosje tjetër, që do t’i dorëzohet Moisiut.

Fatmir Xhafaj: “Opozita ka përgatitur një dosje të plotë, me mendimin e pakicës dhe tërësinë e dokumenteve që provojnë dhe argumentojnë, qëndrimin dhe vlerësimin tonë në këtë proces, të cilat i kemi paraqitur publikisht e theksoj, i kemi paraqitur publikisht edhe në Kuvendin e Shqipërisë. Dosje e cila do t’i dorëzohet sot presidentit të republikës nga kryetarët e grupeve parlamentare të opozitës”.

Vendimi përfundimtar për shkarkimin ose jo të kryeprokurorit Sollaku, do t’i jepet nga presidenti Moisiu, i cili ka kërkuar ditë më parë, gjithë dokumentacionin e përdorur gjatë punës së komisionit hetimor./tvklan.al

Gazetar: Ilir Saqellari


SUBSCRIBE to “RTV KLAN” on YouTube for more videos!

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook: https://www.facebook.com/tvklan/
Follow rtvklan on Instagram: https://www.instagram.com/rtvklan/
Programet e Tv Klan mund t’i ndiqni edhe në faqen https://tvklan.al/programe/

Lajme arkiva 2006

Ndërkombëtarët kanë bërë thirrje, se zgjidhja e krizës politike në vend nuk mund të vijë me bllokim dhe bojkot, por falë konsensusit mes palëve që duhet gjetur përmes dialogut, por kambanat sipas të majtëve, bien për mazhorancën.

Skënder Gjinushi: “Prishësi dhe bllokuesi është shumica e sotme, është kryeministri Sali Berisha, për pasojë, kjo kambanë bie për ta. Ndërsa opozita kërkon, vetëm respektim të standardet konsensuse të arritura”.

Pëllumb Xhufi: “Ne i kemi dëgjuar të gjitha rekomandimet edhe shprehjet e partnerëve tanë ndërkombëtarë, të cilat i vlerësojnë shumë, po interpretimi jonë është ai që më duket dhe interpretimi i drejtë, që qeveria duhet të bëjë një hap ose më mirë të themi disa hapa mbrapa. Në mënyrë që të rivendosim kushtet për një dialog konstruktiv me opozitën”.

Në krahun tjetër shumica shprehet se tashmë janë të gjitha hapësirat për dialog, pas propozimeve të mazhorancës të cilat kanë rënë në vesh të shurdhër.

Bujar Nishani: “Unë ftoj bashkëkryetarin e komisionit të posaçëm parlamentar për reformën zgjedhore, për të ofruar kontribut real dhe konkret në punën për reformën zgjedhore. Nga ana tjetër mesa duket opozita e cila nuk ka asnjë interes, që të realizohet procesi reformës, ofron situata të tilla, të nxehta politike të pushtimit të institucioneve dhe nga ana tjetër, anatemon pikërisht ofertat serioze që bëhen nga ana e mazhorancës”.

Mesa kuptohet të 2 kahet politike mbeten larg kompromisit, megjithëse ndërkombëtarët e kanë kushtëzuar zgjidhjen e krizës politike me konsensusin politik përmes dialogut./tvklan.al

Gazetar: Ilir Saqellari


SUBSCRIBE to “RTV KLAN” on YouTube for more videos!

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook: https://www.facebook.com/tvklan/
Follow rtvklan on Instagram: https://www.instagram.com/rtvklan/
Programet e Tv Klan mund t’i ndiqni edhe në faqen https://tvklan.al/programe/

Lajme Arkiva 2006

Ministri i Brendshëm materializon ftesën e kryeministrit Berisha drejtuar opozitës për të përditësuar regjistrin e përkohshëm të zgjedhësve, i kontestuar fort nga pakica.

Olldashi ka bërë të ditur se socialistët dhe aleatët e tyre do të kenë në dispozicion që nesër regjistrin e përkohshëm elektronik.

Sokol Olldashi: “Vihem në disponim të listave të regjistrit të përkohshëm të shtetasve duke filluar nga mëngjesi i ditës së nesërm. Ne jemi tërësisht të gatshëm të vëmë në dispozicion të tyre në çdo kohë, çdo material që disponohet nga Drejtoria e Përgjithshme e Gjendjes Civile në lidhje me fazën përgatitore paraprake të listave.”

Ministri i Brendshëm nuk beson se vendorët socialistë do të shkelin ligjin duke iu bindur urdhrit politik të drejtuesve të tyre.

Sipas tij nga 133 mijë zgjedhës të përkohshëm të regjistruar në zgjedhjet e kaluara numri i tyre është ulur në 90 mijë dhe një pjesë e mirë kanë lëvizur brenda të njëjtit rreth.

Sokol Olldashi: “Pushtetarët vendorë në të gjithë njësitë e qeverisë vendore të Shqipërisë qofshin të Partisë Demokratike, qofshin të Partisë Socialiste të pavarura të partive të tjera kanë reaguar në mënyrë korrekte ndaj udhëzimeve që janë shpërndarë nga ministria. Në vitin 2005, pra bëhet fjalë për zgjedhjet e 3 Korrikut në lista kanë qenë zgjedhës të përkohshëm 133 mijë gjithsej. Në pritshmëritë e listave të 2006-tës llogaritet rreth 90 mijë, pra janë rreth 43 mijë më pak se ç’kanë qenë në vitin 2005, zgjedhës këta që kanë kaluar në regjistrin e përhershëm të Gjendjes Civile. 19 mijë nga 26 mijë zgjedhës të përkohshëm në Bashkinë e Tiranës janë brenda për brenda njësive të minibashkive të kryeqytetit. Ndërkohë që në fakt në Durrës zgjedhës të përkohshëm janë 8500, pra në regjistrat e përkohshëm nga 136 mijë e 500 zgjedhës që ka pasur Bashkia e Durrësit dhe është po e njëjta situatë si Tirana”.

Në këtë mënyrë mazhoranca mbyll çdo diskutim mbi pretendimet e socialistëve për heqjen e regjistrit të përkohshëm duke theksuar se është e gatshme që t’u japë të gjithë suportin financiar ekspertëve të opozitës për verifikimin e listave./tvklan.al

Gazetare: Mimoza Koçiu

SUBSCRIBE to “RTV KLAN” on YouTube for more videos!

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook: https://www.facebook.com/tvklan/
Follow rtvklan on Instagram: https://www.instagram.com/rtvklan/
Programet e Tv Klan mund t’i ndiqni edhe në faqen https://tvklan.al/programe/

Lajme Arkiva 2006

Temperaturat e larta kanë shkaktuar një rritje të numrit të të prekurve nga epidemitë e verës në qytetin e Beratit, kryesisht tek fëmijët.

Mbi 100 vizita janë kryer gjatë dy ditëve të fundit pranë repartit të pediatrisë në spitalin rajonal.

Të prekurit nga infeksionet që vijnë nga vapa, por dhe nga ushqimet e higjiena janë në masë më të madhe fëmijë nga 0 në 5 vjeç, por nuk mungojnë dhe raste të grupmoshave të tjera.

“Ka një gjendje, e cila normalisht, dmth, ka ardhur me një farë fluksi, i cili reflekton gjendjen e temperaturës, gjendjen e hidrimit, nivelin ushqimor, nivelin e higjienës dhe ajo që duhet të tërheqë vëmendjen si shërbim pediatrie këtu është që familjarët duhet t’i mbajnë fëmijët e tyre në kushte sa më të mira në shtëpi, të ajrosura, të veshur lehtë, t’i japin lëngje herë pas here”.

Për të gjitha këto rastet mjekët kanë ofruar ndihmë me serume dhe medikamente të tjera. Shumë nga të prekurit pasi marrin ndihmën e parë mjekësore trajtohen në kushte familjare, por një numër i konsiderueshëm vazhdojnë mjekimin në spital për shkak të gjendjes së rëndë./tvklan.al

Gazetar: Fatos Hakorja

SUBSCRIBE to “RTV KLAN” on YouTube for more videos!

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook: https://www.facebook.com/tvklan/
Follow rtvklan on Instagram: https://www.instagram.com/rtvklan/
Programet e Tv Klan mund t’i ndiqni edhe në faqen https://tvklan.al/programe/

Lajme Arkiva 2006

Komisioni i Kthimit dhe Kompensimit të Pronave në Vlorë u ka njohur të drejtën e pronësisë për 250 hektarë tokë truall banorëve të fshatit Nivicë.

Trualli është brenda vijës së verdhë në qytetin e Sarandës dhe pjesa më e madhe e tij është e lirë. Niviciotët kishin kërkuar pronësinë mbi 3055 hektarë pyll e kullotë që përfshinte dhe gjirin e Kakomesë.

Në marrjen e këtij vendimi Komisioni i Kthimit dhe Kompensimit të Pronave është mbështetur në një vendim të gjykatës së shkallës së parë të Sarandës që njeh të drejtën për pronësi të vetëm 250 hektarë tokë.

Për pjesën tjetër të kërkuar nga banorët e Nivicës komisioni është shprehur zyrtarisht se dokumentacioni i paraqitur nuk është i plotë dhe nuk përputhet me kërkesat ligjore.

Tashmë konsiderohet i mbyllur konflikti për gjirin e Kakomesë ku banorët organizuan protesta të dhunshme kundër ndërtimit të një fshati turistik.

Toka që u jepet fshatarëve në Sarandë konsiderohet zgjidhje edhe për faktin se ka një çmim të lartë për tregun./tvklan.al

Gazetar: Fatos Hakorja

SUBSCRIBE to “RTV KLAN” on YouTube for more videos!

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook: https://www.facebook.com/tvklan/
Follow rtvklan on Instagram: https://www.instagram.com/rtvklan/
Programet e Tv Klan mund t’i ndiqni edhe në faqen https://tvklan.al/programe/

Lajme arkiva 2006

Punimet për rehabilitimin e nyjës së Zogut të Zi, do të përfundojnë brenda 12 ditëve. Ministri i Punëve Publike dhe Transportit Lulzim Basha, ka deklaruar se volumi i madh i punës dhe punimet pa cilësi të kryera gjatë ndërtimit të nën kalimit janë bërë shkak, për mosrespektimin e afatit për përfundimin e projektit të rehabilitimit.

Lulzim Basha: “Situata në Zogun e Zi është një situatë rehabilitimi, siç e parashikon dhe ligji, kur një objekt i jashtëligjshëm shkatërrohet nga policia ndërtimore, është detyrë e kundra-vajtësit të rehabilitoj situatën. Në rastin e objekteve private të largoj mbeturinat dhe të pastroj sheshin, në rastin e objekteve publike ta rikthejë atë në gjendjen e mëparshme. Është pikërisht ky aktivitet të cilën bashkia nuk e ndërmori, të cilën sot po e koordinon Policia Ndërtimore dhe synimi i aktivitetit është të rehabilitojë dhe të rikthejë në gjendjen e mëparshme gjendjen tek Zogu i Zi. Megjithat mund t’ju them që synimi është që brenda një kohe jo më gjatë se 12 ditë, të stabilizohet dhe të kthehet në gjendjen normale të trafikut tek kryqëzimi i Zogut të Zi”.

Këtë deklaratë Basha e ka bërë gjatë një seminari të organizuar nga kompania konsulente në fushën e projektimit të rrugëve Ektisa, e cila në bashkëpunim me specialistët vendas po përgatit projektin e standardit të projektimit dhe ndërtimit të rrugëve, që do të dojë rreth 15 muaj për t’u hartuar.

Lulzim Basha: “Është hapi i parë në vendosjen e standardi shqiptarë të projektimit dhe ndërtimit të rrugëve. Një standard i cili pa dyshim duhet të jetë të paktën i barasvlefshëm me standardet minimale europiane. Në radhë të parë, duke pasur parasysh synimin madhorë të qeverisë dhe të vendit tonë për integrim në BE është hapi më i rëndësishëm politikbërës, por me një efekt drejtpërdrejt në projektim e ndërtim rrugësh, sa i përket integrimit të këtij sektori në suazën e BE”.

Sipas ministrit Basha deri më tani për ndërtimin e rrugëve në vend, janë përdorur standarde të ndryshme në varësi të investitorëve dhe kjo është 1 nga shkaqet kryesore për gjendjen aktuale të rrugëve nacionale në Shqipëri./tvklan.al

Gazetare: Elja Zotka


SUBSCRIBE to “RTV KLAN” on YouTube for more videos!

Për më shumë informacione vizitoni faqen tonë web https://tvklan.al/
Videot e fundit nga Tv Klan i gjeni në faqen https://tvklan.al/video/
Follow Tvklan on Facebook: https://www.facebook.com/tvklan/
Follow rtvklan on Instagram: https://www.instagram.com/rtvklan/
Programet e Tv Klan mund t’i ndiqni edhe në faqen https://tvklan.al/programe/